Нартхэмрэ пасэрей адыгэхэмрэ
Нарт эпосым зэрыхэтымкӀэ, нартхэм къайныкъуэкъуу щытащ чынтхэр. АтӀэ чынтхэр армырауэ пӀэрэ «синд» жыхуаӀэу къэралыгъуэ мыину адыгэщӀым зэманыжьым исар?
Синд къэралыгъуэр, илъэс минитӀрэ ныкъуэкӀэ узэӀэбэкӀыжмэ, Боспор къэралыгъуэм и унафэм щӀоувэ икӀи зы лӀэщӀыгъуэрэ ныкъуэрэ дэкӀа нэужь, хуэмурэ и щхьэхуитыныгъэр фӀокӀуэд. Синд пащтыхьхэм я щӀэинхэр куэду къыщӀахыжащ дуней псом щыцӀэрыӀуэ зэшиблым я Ӏуащхьиблу Ӏэнапэ щӀыналъэм щыӀэм. Абыхэм ящыщу плӀыр яхъунщӀагъэххэт. ХъунщӀакӀуэ Ӏэ фӀейхэр здынэмыса Ӏуащхьищым къыщӀэкӀам уащыхэплъэкӀэ, лъэпкъым а зэманым мэкъумэш щэнхабзэ лъагэ дыдэ зэриӀам урегъэувалӀэ. Мыбы щыкуэдщ санахуафэхэм щхьэкӀэ зэрахьэу щытауэ дыщэм, дыжьыным къыхэщӀыкӀа бжьэхэр. ГъэщӀэгъуэныр аракъэ, зэшиблым я Ӏуащхьэхэм къыщӀахыжа бжьэхэм ящыщ зым и кӀапэм фӀащӀыхьащ кӀапсэ гъэща зи пщэм илъ хьэ, адыгэхьэм зэрызигъэпсэхум ещхьу, и фӀалъэ лъакъуитӀым и щхьэр телъу. ЛӀыжьхэм зэрыжаӀэжымкӀэ, адыгэхьэхэм шым укърахьэхынут, абыхэм дыгъужьхэр зэуэзэпсу ялӀыфырт, хуабжьу хъумакӀуэ сакъхэт.
Пащтыхь лӀахэм шы-уанэ зэтелъ зэрыдыщӀалъхьэ хабзэр мыбдежми щынаӀуэщ, икӀи абыхэм я ӀэпслъэпсхэмкӀэ зэхыбогъэкӀыф уанэшхэмрэ щӀащӀэу щытахэмрэ. (Псалъи 139-рэ мэхъу).

Лэжьыгъэхэр
1. Псалъэхэм я мыхьэнэр вгъэбелджылы:
ЛӀэщӀыгъуэ, щӀэин, санэхуафэ, фӀалъэ лъакъуэ, Ӏэпслъэпс.

2. Хэкумрэ щӀыналъэмрэ ехьэлӀа адыгэ псалъэжьу тху е нэхъыбэ къэфхь.

3. Псалъэухар синтаксис и лъэныкъуэкӀэ зэпкърыфх.
Пащтыхь лӀахэм шы-уанэ зэтелъ зэрыдыщӀалъхьэ хабзэр мыбдежми щынаӀуэщ икӀи абыхэм я ӀэпслъэпсхэмкӀэ зэхыбогъэкӀыф уанэшхэмрэ щӀащӀэу щытахэмрэ.

Фи махуэ ф1ыуэ! Мы лэжьыгъэр сыхьэтит1ым хухэхащ. Лэжьыгъэр вгъэзащ1эу 29.11.адрей фи лэжьыгъэм щ1ыгъуу къэфхьыж хъунущ!
Текстыр тетрадым ивотхэ.Ит1анэ лэжьыгъэхэм ещ1апхъэр фогъэзащ1э!