Кюн ахшы болсун, багъалы окъуучула! Отарланы Саидни «Насйхат сёз» деген назмусун кёл салып окъугъуз, малкъар литературада магъаналары бла бу назмугъа келишген чыгъармаланы эсигизге тюшюрюгюз. Жашауда намысха-сыйгъа, адамлыкъгъа юйретген чыгъармалада айтылгъан жорукълагъа сыйынып жашаргъа итинигиз.

Насийхат сёз
Жигит! Барды осуятым,
Таза жюрек аманатым,
Санга сюйюп айтхан затым.
Эсге сингсин ма бу хатым:

Жангылмазса, къулакъ салсанг,
Ахшы сёзню эсге алсанг,
Тюз жол бла атлап барсанг,
Устаз болур, ангыласанг.

Ишни башы адамлыкъды,
Керти жолгъа ол саллыкъды,
Тёрге алып ол барлыкъды,
Биргенге да ол къаллыкъды.

Ол кеси келип къалмайды,
Тюй болуп да жыйылмайды,
Тилеп да ол табылмайды,
Сатылып да алынмайды.

Халкъда табарыкъса аны,
Аллайланы ахшы таны.
Оюм берир ахшы киши,
Жолгъа салыр сёзю, иши.